Man in hegtenis wat vriend doodry
2011-11-02 19:06
Johannesburg – ‘n Man wat na bewering sy vriend doodgemaak het deur oor hom te ry, is in Sharpeville in hegtenis geneem, het die polisie in Gauteng Woensdag gesê.
Volgens ao. Aubrey Moopeloa het die 26-jarige man blykbaar Saterdag ná hy gedrink het oor sy vriend gery.
“Dit wil voorkom of hulle in ‘n bakleiery met ander mense betrokke geraak het toe hulle gedrink het. Die twee het probeer wegkom.”
Hy het gesê die man het blykbaar agteruit gery en nie sy 35-jarige vriend agter die motor gesien nie.
Volgens Moopeloa is ‘n ambulans uitgeroep, maar die vriend is op pad na die hospitaal oorlede.
Die bestuurder is daarvan aangekla dat hy sonder ‘n bestuurslisensie bestuur het en versuim het om ‘n ongeluk aan te meld. Hy word ook van strafbare manslag aangekla.
- Volg Nuus24 op Twitter
- SAPA