Man in Charlize Theron se ou huis vermoor
2012-10-03 10:37
Johannesburg – 'n Man van Benoni is in dieselfde huis vermoor waarin die aktrise Charlize Theron grootgeword het, het The Star Woensdag berig.
Die Oscar-bekroonde aktrise se ma, Gerda, het haar man uit selfverdediging in dieselfde huis in 1991 geskiet.
Die man, Barry Newland, wat Vrydag vermoor is, het sy onderneming vanuit die perseel in Sewendestraat, Rynfield bedryf.
Volgens lt. Nomsa Sekele, 'n polisiewoordvoerder, het vyf rowers toegang tot die eiendom verkry deur voor te gee hulle stel belang om een van Newland se vriendin, Joy Preft, se motors te sien.
Newland se tuinier en huishulp het die mans ingelaat. Hulle het Newland vasgemaak toe hy by die huis kom en 'n plastieksak oor sy kop vasgebind, waarna hy versmoor het.
Die tuinier en huishulp is na 'n ander kamer geneem, waar hulle ook vasgemaak is.
Sekele het gesê Newland is met sigarette en 'n strykyster gebrand. Newland se vriend, Chris Ehlers, het dit egter ontken.
'n Selfoon is tydens Vrydag se voorval gesteel. Preft het gesê 'n skootrekenaar, twee kameras, 'n iPod en twee goue hangertjies is ook gesteel.
Niemand is nog in hegtenis geneem nie.
Theron se ma het in 1991 haar pa geskiet toe hy dronk by die huis aangekom en gedreig het om haar ma en dogter met sy haelgeweer te skiet.
Gerda was nie vervolg nie omdat sy uit selfverdediging opgetree het.
– Volg Nuus24 op Twitter.
- SAPA
