Man hoor glo gille, vind vrou se lyk
2013-02-12 15:03
Kaapstad – 'n Vrou se lyk is Dinsdag op 'n oop stuk veld naby 'n gebied in Beacon Hill, Atlantis, gevind, het die polisie aan Eyewitness News bevestig.
'n Omstander het aan die radiostasie gesê 'n inwoner het gille in die vroeë oggendure gehoor, maar teen die tyd wat hy buite gekom het, was die vrou reed dood.
Die polisie kan in die stadium nie bevestig hoe die vrou dood is nie en niemand is nog in verband met die voorval in hegtenis geneem nie.
"Ongelukkig kan ons nie bevestig hoe die vrou dood is nie. 'n Nadoodse ondersoek moet gedoen word, maar ons dink sy is sowat 20 jaar oud," het Cyril Dicks, polisiewoordvoerder gesê.
Tientalle inwoners het op die toneel saamgedrom en hul woede oor nóg 'n moord in die dorp uitgespreek.
Dié voorval kom slegs dae nadat 'n tiener van Kraaifontein verkrag en vermoor is en die voorval in Bredasdorp waarin die 17-jarige Anene Booysen aangerand, verkrag en vermink is.
– Volg Nuus24 op Twitter
