Man hof toe oor 'gevaarlike' gholfballe

2013-02-06 09:06

Johannesburg – ‘n Inwoner van ‘n gholflandgoed in Vanderbijlpark het ‘n klagte by die hooggeregshof in Pretoria ingedien waarin hy beweer gholfballe wat sy huis tref, is gevaarlik, het The Star Woensdag berig.

Eric Schoeman het die hof vir ‘n interdik genader wat die Emfuleni Gholfbaan se eienaars moontlik kan dwing om spelers te verhoed om by die 14de putjie af te slaan.

Schoeman sê dié putjie is slegs 10 m van sy huis af. Hy sê hy beskou dit as uiters gevaarlik, omdat die huis en woonvertrek gereeld deur gholfballe getref word.

Toe Schoeman aanvanklik sy huis op die landgoed gebou het, het die eienaar met hom 'n mondelinge ooreenkoms aangegaan om die putjie verder van sy eiendom te skuif.

Die gholfbaan is sedertdien verkoop en die nuwe eienaar, SY Kim, sê daar is nie voorsiening vir dié kwessie in die koopooreenkoms gemaak nie.

Kim meen die saak moet deur middel van arbitrasie hanteer word, eerder as deur regsprosesse.

Regter Natvarlal Ranchod het gevra dat die partye op ‘n latere datum bewyse indien.

– Volg Nuus24 op Twitter

- SAPA