Man gryp tienermeisie in Roodepoort
2011-10-12 14:30
Johannesburg – ‘n Man het na bewering ‘n tienermeisie op pad skool toe in Roodepoort aan die Wes-Rand ontvoer, het die polisie gesê.
‘n Grys Toyota Hilux-bakkie het Woensdagoggend omstreeks 07:00 langs twee meisies op die hoek van Rina- en Hermanstraat in White Ridge stilgehou, het lt.kol. Tshisikhawe Ndou gesê.
“’n Man het uitgeklim en die tiener beveel om in die voertuig te klim. Toe die meisie geweier het, het hy ‘n vuurwapen op haar gerig..."
Die ander meisie het weggehardloop en die bakkie het met Louise de Waal, haar 17-jarige vriendin, weggery.
Beide meisies is leerlinge aan die Hoërskool Die Burger in Roodepoort.
Ndou sê die verdagte het bruin hare en is tussen die ouderdom van 20 en 30.
Die vermiste meisie het ‘n rooi en swart romp en ‘n swart trui met ‘n geel kraag gedra.
Ndou sê die polisie is besig om ‘n identikit saam te stel.
Volg Nuus24 op Twitter
- SAPA