Man gou voor ná Matie (20) verkrag is
2010-10-30 11:00
Stellenbosch - ’n Man (22) sal Maandag in die plaaslike landdroshof verskyn in verband met die beweerde verkragting van ’n 20-jarige Matie wat vroeër vandeesmaand in haar meenthuis hier oorval is.
Die verdagte, wie se naam nie genoem kan word voor hy in die landdroshof op dié aanklag gepleit het nie, is op 16 Oktober in hegtenis geneem.
Die man is in hegtenis geneem nadat ’n jong vrou op 16 Oktober omstreeks 06:30 in haar meenthuis deur ’n gewapende man oorval is. Sy woon in ’n sekerheidskompleks, Simonsrust, naby die Simonsrust-sentrum in Cluverstraat.
Kapt. René Matthee, Stellenbosch se polisiewoordvoerder, het gesê die vrou, ’n student aan die Universiteit Stellenbosch, het vroegoggend opgestaan om haar hond uit te laat. Sy het later weer gaan slaap. Sy het later wakker geskrik en ’n gewapende man was langs haar bed. Hy het ’n mes in sy hand gehad.
“Die slagoffer het geskreeu. Die verdagte het glo vir haar gesê om stil te bly. Hy het haar na die spaarkamer geneem en haar na bewering verkrag. Hy het haar daarna in die badkamer toegesluit,” het Matthee gesê.
Die slagoffer het ’n gat in die badkamerdeur geskop waardeur sy kon kruip en het hulp ontbied. Haar bure het die polisie gebel.
Volgens Matthee is ’n skootrekenaar, ’n Blackberry-selfoon, ’n beursie, ’n rybewys, bankkaarte en ’n iPod gebuit.
’n Uur ná die beweerde voorval het lede van die Stellenbosch-polisie in die Simonswyk-gebied gepatrolleer. “Die beamptes het ’n verdagte motor met drie insittendes gesien en die voertuig van die pad getrek. Die gesteelde goedere is in dié voertuig gevind.
“Die beskrywing wat die slagoffer gegee het van die beweerde verkragter, het ooreengestem met een van die mans in die voertuig. Die drie insittendes is in hegtenis geneem,” het Matthee vervolg.
Twee van die verdagtes is vir die besit van gesteelde goedere aangekeer. Twee van die drie verdagtes sal Maandag om borgtog aansoek doen. ’n Saak van verkragting en huisbraak word ook ondersoek.
- Die Burger