Man gooi emmer suur oor vrou uit

2012-08-23 20:57

Johannesburg – ‘n Man van Soweto is in hegtenis geneem nadat hy Donderdag suur oor sy vrou uitgegooi het, het die polisie in Gauteng gesê.

Die 42-jarige vrou is in ‘n kritieke toestand na ‘n plaaslike hospitaal geneem nadat sy ernstige beserings aan haar gesig, bors en bene opgedoen het, het ao. Kay Makhubele gesê.

“[Die voorval] het by die huis in Soweto plaasgevind waarin die paartjie gewoon het voordat hulle opgebreek het.”

Die man (44) het die huis Donderdag besoek. Ná ‘n gesprek met sy vrou het hy weggegaan en teruggekeer met ‘n emmer waarin ‘n mengsel van suur en water was. Hy het dit glo oor haar uitgegooi en toe gevlug.

Die bure het die polisie in kennis gestel en die vrou is per ambulans na ‘n hospitaal gehaas.

Die man is later by die Jabulani-winkelsentrum in hegtenis geneem.

Hy sal op ‘n aanklag van poging tot moord in die Protea-landdroshof verskyn.

– Volg Nuus24 op Twitter


 

- SAPA