Man glo sonder rede in hegtenis geneem
2010-09-02 13:07
Pieter Steyn
Bloemfontein - ’n Jong Bloemfonteinse man is Dinsdagmiddag glo verkeerdelik deur die polisie in hegtenis geneem.
Neels Niemand (20) het Woensdag aan Volksblad vertel twee polisiebeamptes van die Navalsig-polisiekantoor het sonder om ’n woord te rep langs hom gestop, hom geboei en agter in die polisievangwa geboender.
“Ek was op pad om drie DVD’s wat ek gehuur het te gaan teruggee. Ek het deur die spruit naby Normandielaan in Noordhoek gestap toe ek die polisiebakkie sien aankom. Hulle het langs my gestop en my sonder om ’n woord te rep geboei en agter in die vangwa gegooi. Hulle wou my nie antwoord toe ek vra waarom ek in hegtenis geneem word nie. Daarna het hulle deur die veld gejaag.”
Niemand sê hulle het toe gestop in Normandielaan en met ’n vrou Sotho gepraat.
“Die een, ’n konstabel, het my toe gevra waar is my ‘white bra’ en die twee selfone en beursie wat ek gesteel het. Ek het ontken dat ek dit gedoen het. Hulle het my sakke deurgesoek en my selfoon en beursie gevat.” Hulle het dit later weer teruggegee.
Niemand sê hulle het nog ongeveer ’n halfuur met die vrou gepraat, terwyl hy geboei gestaan het. Daarna het hulle hom laat gaan. “Ek het gevra of hulle my net weer sal gaan aflaai waar hulle my opgelaai het, waarop hulle toe geantwoord het ek moet maar self regkom.”
Niemand sê hy is baie kwaad en hoop nie die twee beamptes kom skotvry daarvan af nie.
“Ek het ’n aanrandingsklag ingedien.”
Kapt. Chaka Marope, polisiewoordvoerder, het bevestig ’n klag van aanranding word ondersoek en die polisie sal vandag in ’n verklaring op Volksblad se navrae reageer.
- Volksblad