Man eis oor polisie 'nie reg optree'
2011-10-09 10:59
Kaapstad – ’n Nutsman van Bellville gaan Maandag ’n siviele eis van R500 000 teen die minister van polisie instel nadat hy in Mei 2009 aangekla is van die moord op ’n 17-jarige seun.
Francois Pretorius (25) glo die polisie het onregmatig opgetree.
Rapport het destyds berig Pretorius was op 28 Maart 2009 ’n gas op die troue van Ryand en Linda Liebenberg op die plaas Rusticana, buite Klapmuts.
Hy het toe die seun, Adriaan Plaatjies, betrap waar hy glo by ’n motor ingebreek het. Van die gaste het toe glo nadergekom en Adriaan aangerand.
’n Erg beseerde Adriaan – sy lewer was geskeur – is die volgende oggend 06:00 langs ’n grondpad etlike kilometer van Rusticana gevind.
Hy is dood voordat mediese hulp opgedaag het en Pretorius is toe van moord aangekla.
Hy het egter skuld ontken en is op borgtog van R500 vrygelaat.
Die staat se getuies kon tydens die verhoor in die Paarl-streekhof Pretorius nie met die aanval op en dood van Adriaan verbind nie.
Ná versoek van sy regspan het landdros Anne-Marie Immelman op 1 September vanjaar die aanklag teen Pretorius laat vaar.
Vrydag het Katriena Plaatjies, Adriaan se ma, haar “skok en verbasing” uitgespreek.
“Wie gaan nou sê wié my seun vermoor het?” wou ’n hartseer Plaatjies weet. “Ek voel nie lekker nie. Adriaan se pa (André Daniels) gaan Maandag na die polisie om te hoor of hulle nog die skuldiges gaan soek.”
Vir Pretorius is die uitslag “’n groot verligting”.
“Ek het twee jaar lank ’n swaard oor my kop gehad. My sakeonderneming het baie werk verloor, want mense wou my moeilik in hul huis toelaat.”
Kabelo Mogale, ’n staatsaanklaer, sê enige nuwe vervolging kan slegs volg indien ’n lid van die publiek met nuwe inligting oor die betrokke voorval na vore kom sodat die polisie ’n prima facie-saak kan bou.
Volg Nuus24 op Twitter
- Rapport