Man doodgesteek toe hy rusie probeer opbreek

2012-10-07 15:00

Johannesburg – 'n 27-jarige man is in hegtenis geneem nadat hy 'n ander man met 'n mes in Mthatha in die Oos-Kaap doodgesteek het, het die polisie Sondag gesê.

Die verdagte het sy vrou by 'n bushalte in die gebied aangerand. Toe die slagoffer (29) nader stap om tussenbeide te tree is hy met 'n mes gesteek, het polisiewoordvoerder Mzukisi Fatyela gesê.

Fatyela het gesê 'n woedende skare het die verdagte begin aanval waarna hy onder polisiebewaking na 'n hospitaal geneem is.

Hy sal in die Mthatha-landdroshof verskyn sodra hy uit die hospitaal ontslaan word, het Fatyela gesê.

Volg Nuus24 op Twitter.

- SAPA