Man dood ná hy uit voertuig geslinger word
2011-06-18 22:01
Senekal - Een man is dood en 20 mense beseer toe 'n taxi en 'n VW Golf op die R70, 10 km buite Senekal, teen mekaar gebots het, het paramedici Saterdag gesê.
Vanessa Jackson, woordvoerder vir ER24, het gesê die taxi was van Johannesburg na Ficksburg onderweg toe die ongeluk plaasgevind het.
Die bestuurder van die Golf moes die meeste van die impak verduur en is uit sy voertuig geslinger. Hy is op die toneel dood verklaar.
Sy drie passassiers het geringe beserings opgedoen.
Drie insittendes is in die taxi vasgekeer toe dit omgeslaan het, maar sommige passassiers het daarin geslaag om self uit die voertuig te klim.
Lewenskake is gebruik om die taxi se dak te verwyder.
Nege taxi-passassiers was in 'n kritieke toestand, en het verskeie beserings opgedoen, terwyl ander insittendes net lig beseer is. Beseerdes is na die Dihlabeng-hospitaal in Bethlehem geneem.
– Volg Nuus24 op Twitter.
- SAPA