Man deur inbrekers geskiet
2010-07-08 10:34
Johannesburg – ‘n Man is vroeg Donderdagoggend in 'n kompleks in Honeydew, noordwes van Johannesburg geskiet, het paramedici gesê.
“Die 52-jarige pa van twee sê hy het wakker geskrik toe hy geraas naby sy bed hoor. Toe hy sy oë oopmaak het hy vier onbekende mans in sy kamer gesien,” het Vanessa Jackson, woordvoerder van ER24, in ‘n verklaring gesê.
“Die man het begin skree, waarna een van die mans ‘n skoot afgevuur het. Die mans het toe weggehardloop.”
Volgens Jackson het die 52-jarige man bors en rugbeserings opgedoen.
Hy is na die hospitaal gehaas en is tans in ‘n stabiele toestand. Sy vrou en twee dogters is nie in die voorval beseer nie.
Die vier verdagtes het met waardevolle besittings weggekom.
- Volg Nuus24 op Twitter.
- SAPA