Man dagvaar ná 'aanranding' by laerskool

2012-08-06 12:31

Johannesburg – ‘n Oudleerling dagvaar die departement van basiese onderwys en ‘n voormalige onderwyseres vir R4 miljoen nadat hy ná ‘n beweerde aanranding gestremd gelaat is, het ‘n koerant berig.

The Sowetan berig Selly Oupa Mokonyama (22) het hofdokumente by die Pretoriase hooggeregshof ingedien. Hy beweer sy onderwyseres by die Molemo-laerskool in Limpopo het hom met ‘n besem geslaan toe hy agt jaar oud was.

Hy sê die onderwyser het hom talle kere geslaan en sy ruggraat in die proses beseer.

“...Ek het op die vloer neergeval en kon nie weer opstaan nie,” het hy aan die koerant gesê.

“Ek was by een hospitaal na die ander, maar daar is niks wat die dokters vir my kan doen nie.”

Hy het aan die koerant gesê hy het later ‘n operasie ondergaan en kan nou sit, maar dat sy balans nog nie herwin is nie.

Hy beweer hy kan nie sonder krukke loop nie.

“Ek wou ‘n sokkerspeler en ‘n meganiese ingenieur word. Sy [die onderwyseres] het my lewe verwoes.”

Luidens die berig is die saak uitgestel om die departement kans te gee om te reageer.

Volg Nuus24 op Twitter  

- SAPA