Man beseer toe motor koedoe tref

2012-01-25 16:54

(Netcare 911)

Kaapstad – ‘n Man is beseer terwyl vier ander ongedeerd is nadat hul voertuig ‘n koedoe tussen Viljoenskroon en Kroonstad getref het, het paramedici gesê.

Daar word vermoed dat die koedoe oor ‘n heining gespring het en voor die motor beland het, het Chris Botha, ‘n woordvoerder vir Netcare 911, in ‘n verklaring gesê.

Die ongeluk het Woensdagoggend net voor 08:00 gebeur.

Die motor se dak en voorruit is erg beskadig.

Botha sê die bestuurder van die motor is op die toneel vir ligte snyplekke behandel.

Paramedici was verbaas dat die man se familie nie beseer is nie.

Volg Nuus24 op Twitter

- Nuus24