Man beseer in padwoede-aanval

2012-03-12 11:05

Johannesburg – ‘n Man is oor die naweek beseer toe hy in ‘n vermeende padwoede-aanval deur die bestuurder van ‘n minibus-taxi geslaan is, het ‘n berig Maandag gesê.

Alan Molaudi het op Jan Smuts-rylaan in Hyde Park gery toe ‘n taxi voor hom ingesny en hom gedwing het om stil te hou, het The Star berig.

Volgens Molaudi het hy probeer om met die bestuurder te praat, maar dié het op hom gevloek.

By die volgende verkeersligte het die taxi-bestuurder agter hom stilgehou en met ‘n knopkierie uit sy voertuig geklim.

Molaudi het ook uit sy voertuig geklim en is deur die taxibestuurder op sy arm geslaan. Passasiers in die taxi het die aanval glo probeer keer.

Die taxibestuurder het Molaudi se motorsleutels uit die motor geneem en hom verhoed om verder te ry.

Hy is in die ribbes en teen ‘n vinger geslaan en het gevolglik breuke opgedoen.

“As hy ‘n geweer gehad het, sou hy my geskiet het. Ek is kwaad. Ek weet nie of ek reg gaan kom nie. Ek kan nie vir lank asemhaal nie, want my bors is seer en my neus is toe. Ek kan nie reg loop nie. Al wat ek kort is geregtigheid.”

Molaudi het daarin geslaag om die taxi se registrasienommer te memoriseer en die polisie het bevestig dat ‘n saak aanhangig gemaak is.

– Volg Nuus24 op Twitter
 

- SAPA