Man beboet ná hy whiskey op Zuma mors
2011-11-30 14:33
Johannesburg – Die man wat daaraan skuldig bevind is dat hy 'n drankie op pres. Jacob Zuma gemors het, is Woensdag met R8 000 beboet.
Daryl Peense is vroeër aan aanranding skuldig bevind ná die voorval verlede jaar by die Durban July-perdewedren.
'n Proefbeampte het vroeër getuig Zuma onthou nie dat Peense drank op hom gemors het nie.
Masisi Modikoane, proefbeampte, het getuig in die verhoor van Peense, wat in Julie vanjaar weens dié voorval aan aanranding skuldig bevind is.
“Toe ek met die president gepraat het, het hy gesê hy ken Peense nie en het nie gesien dat hy ’n drankie op hom mors nie.”
Sy het ’n opgeskorte vonnis vir Peense voorgestel sodat hy ’n rehabilitasieprogram vir ’n alkoholprobleem kan volg.
Peense het in sy verhoor ontken hy het sy drankie doelbewus gemors en aangevoer mense het teen hom gestamp in ’n poging om Zuma beter te kan sien.
Volgens hom was hy dronk en het hy op ’n balkon gestaan.
Modikoane het gesê tydens hul onderhoud was Peense oop en positief. “Hy het my vrae beantwoord en het saamgewerk.”
– Volg Nuus24 op Twitter
- Beeld