Man aangekeer oor beweerde bedrogspul
2010-10-13 09:02
Welkom - ’n Man van Welkom wat sedert 2003 verskeie kere met die gereg gebots het, is weer in hegtenis geneem nadat Goudvelders na bewering met ’n beleggingskema en beloftes van goedkoop motors uit sowat R3 miljoen bedrieg is.
Pensioentrekkers is hul enigste geld kwyt, mense het hul huise verloor en ’n man wat sy werk in Tanzanië bedank het, is nou werkloos.
Shane Labuschagne (40) is ná sy jongste inhegtenisneming hier in die landdroshof op borgtog van R20 000 met baie streng voorwaardes vrygelaat. Hy moet op 28 Oktober weer in die hof verskyn.
Talle ouers met kinders op universiteit het na bewering met een van Labuschagne se skemas duisende rande verloor.
Hy sou glo vir hulle Volkswagen Golfs teen R15 000 elk by die staatsgarage in Pretoria kry.
’n Sakeman van Odendaalsrus, wat Labuschagne jare reeds ken, het glo talle kennisse aangeraai om van die aanbod gebruik te maak. Hulle het hul geld aan hom gegee en hy het dit aan Labuschagne oorbetaal, maar die motors het nie bestaan nie.
’n Afgetrede vrou van Odendaalsrus het glo R310 000 by Labuschagne belê. Nadat sy hom gekonfronteer het omdat die rente nie meer betaal word nie, is ’n tjek vir R432 000 in haar rekening inbetaal. Daar was egter geen geld nie.
Sers. Mmako Mophiring, woordvoerder van die polisie se eenheid teen georganiseerde misdaad (die Valke) in die Vrystaat, sê tientalle klagte word nou teen Labuschagne ondersoek.
Hy sê volgens die voorlopige ondersoek is beleggers rente van tot 20% per maand belowe.
Hul beleggings is gebruik om geld teen hoë rente aan staatsamptenare uit te leen.
Mophiring sê ná Labuschagne se inhegtenisneming het nog klaers na vore gekom en die polisie vermoed dat nog mense na bewering bedrieg is.
Hulle word versoek om kapt. Neels Goosen van die polisie se handelsmisdaadeenheid in Welkom by 082 562 4354 te bel.
Labuschagne was in 2007 in die nuus toe beweer is dat hy mense uit duisende rande gekul het met die vals hoop van opleiding en werk op myne.
Hy is in hegtenis geneem, maar vrygespreek. Hy was by die Lengau-opleidingsentrum betrokke.
- Volksblad