Man 50 m geslinger in gru-ongeluk

2012-09-15 23:00

Johannesburg – Twee mans is Saterdag in 'n gru-ongeluk op die N3-hoofweg in Westville, KwaZulu-Natal, dood.

Die presiese oorsaak van die ongeluk is nog nie vasgestel nie, maar die bestuurder het blykbaar beheer verloor oor sy Ford Bantam-bakkie voordat dit die pad verlaat en teen 'n paal langs die pad gebots het.

Paramedici van ER24-nooddienste sê die bakkie het in twee stukke geskeur.

Die twee insittendes, albei mans in hul twintigs, is uit die voertuig geslinger.

Een van die oorledenes is byna 50 m van die wrak gevind.

Hy het noodlottige beserings opgedoen en is op die toneel dood verklaar.

Die ander man het ernstige beserings insluitende kop- en borsbeserings asook gebreekte bene gehad.

Nooddienspersoneel het probeer om hom by te bring, maar hy is ook later dood verklaar.

Plaaslike owerhede is tans op die ongelukstoneel en sal die oorsaak van die ongeluk ondersoek.

Volg Nuus24 op Twitter.