Man (45) se lyk in dam gevind
2011-09-24 23:00
Johannesburg – Die liggaam van 'n onbekende 45-jarige man is in 'n dam by die dorpie, Maila-Mapitsane in die Sekhukhune-gebied van Limpopo gevind, het RSG Saterdag berig.
'n Polisiewoordvoerder, Mohale Ramatseba sê die liggaam is ontdek deur 'n vrou wat gaan water haal het.
Die polisie het 'n beroep op die gemeenskap gedoen om enige vermiste persone aan te meld.
Intussen berig Sapa dat die lyk van nog 'n onbekende man in Oos-Londen gevind is.
Die liggaam is Vrydagmiddag deur lede van die gemeenskap in 'n beboste gebied gevind, het kaptein Steven Marais gesê.
Aanvanklike ondersoeke het getoon dat die man reeds 'n week lank dood is toe sy liggaam ontdek is.
Marais sê die slagoffer se ouderdom kon nie vasgestel word nie.
Die polisie wag op die uitslag van die nadoodse ondersoek om die oorsaak van sy dood te bepaal.
Volg Nuus24 op Twitter.