Mamphela Ramphele 'wil land van drome' herbou
2013-02-18 11:29
Johannesburg – Dr. Mamphela Ramphele het Maandag op 'n mediakonferensie in Johannesburg aangekondig dat sy 'n "politieke platform" gaan stig om die "land van ons drome" te herbou.
"My reis is 'n reis van 'n soeker wat droom van 'n beter toekoms vir almal," het sy gesê.
"Ek is nie 'n messias nie, maar ek is bereid om 'n brug tussen dié generasie en die kinders te bou. Ongelukkig het die land van ons drome weggekwyn. Ons moet aan ons kinders sê : Ons het julle gefaal."
Sy het ook gesê dit was nooit in haar toekomsplanne om 'n politieke party te stig of om by 'n politieke party aan te sluit nie.
Die naam van die forum is Agang, wat beteken om te bou.
Sy het haar vriende en familie bedank vir hul teenwoordigheid by die geleentheid.
Die aankondiging kom ná maande se bespiegeling oor die moontlikheid dat dié akademikus en aktivis haar by die DA gaan aansluit, of haar eie politieke party gaan stig.
Ramphele het verlede week met onmiddellike effek as voorsitter van Gold Fields bedank "om haar sosio-ekonomiese en politieke werk voort te sit", het Sven Lunsche, woordvoerder van die maatskappy, verlede week in 'n verklaring gesê.
Lunsche het gesê Cheryl Carolus, 'n nie-uitvoerende direkteur, sal Ramphele opvolg.
Ramphele het ’n geskiedenis as voorstander van die swartbewussynsideaal tydens die bevrydingstryd, is ’n voormalige rektor van die Universiteit van Kaapstad en leidende figuur by die Wêreldbank.
Helen Zille, DA-leier, het verlede jaar probeer om Ramphele sover te kry om by die DA aan te sluit, maar Ramphele het gekies om haar eerder toe te spits op die Citizens’ Movement, ’n nie-regeringsorganisasie wat sy gestig het om maatskaplike verandering te versnel, is vroeër berig.
– Volg Nuus24 op Twitter
- Nuus24
