Malema wou nóg ’n plaas koop
2011-08-06 10:00
Johannesburg - Julius Malema, ANC-jeugleier, sou glo R800 000 as kontantdeposito vir ’n plaas van R3,5 miljoen neersit.
Volgens Dries Kotzé (63), die eienaar, het Malema kop uitgetrek weens al die media-aandag op hom.
Die plaas Schuilkraal, sowat 12 km wes van Polokwane, is 139 ha groot.
Volgens bure het Kotzé die laaste paar maande vertel Malema het hom op die plaas besoek en dat hy ’n gentleman is.
Die koopprys is glo op R3,5 miljoen vasgestel, wat Malema in twee of drie paaiemente sou afbetaal nadat hy ’n kontantdeposito van R800 000 betaal het. Kotzé het gistermiddag aan Beeld gesê hy is ’n week gelede in kennis gestel Malema het die koop gekanselleer.
“Ek glo dit is as gevolg van al die gerugte.”
Kotzé het geweier om die prys te bevestig en verder daaroor te praat.
“Die plaas is nie in sy naam nie, dit is nog in my naam. Daar is niks meer as dit nie.
“As jy hieroor gaan skryf, gaan daar moeilikheid wees,” het Kotzé gesê.
Toe Beeld Kotzé gisteraand weer bel, het hy gesê Malema het vier maande gelede net R1,5 miljoen aangebied vir die plaas. Dit is baie minder as wat Kotzé wou hê en die plaas is daarom nie verkoop nie.
Sy bure meen die transaksie gaan voort en daar word nou moontlik net probeer om die media te mislei.
Een van die bure beweer daar is al ’n geruime tyd sprake dat ’n teerpad van sowat 20 km oor die plaas gebou gaan word, maar Kotzé het gesê hy weet niks daarvan nie.
Die Mail & Guardian (M&G) het gister berig Malema se trust, The Ratanang Family Trust, besit aandele in die maatskappy On-Point Engineering, wat in 2009 ’n kontrak ontvang het om die programbestuurseenheid van Limpopo se departement van paaie en vervoer te bestuur. Dié eenheid se pligte sluit die beplanning van, kontraktering vir en toesig oor padwerk in.
Daarvoor sou die maatskappy oor drie jaar R52 miljoen betaal word.
“Dit beteken Malema het ’n indirekte invloed oor aan wie tenders toegeken word,” lui die berig.
Malema, On-Point en die departement het dit aan M&G ontken.
Floyd Shivambu, jeugliga-woordvoerder, het gister geweier om Beeld se navrae oor die koop van die plaas en die deurpad te beantwoord.
Jan Kampherbeek, Kotzé se prokureur, het ook geweier om enige vrae oor die plaas te beantwoord.
Malema het onlangs in die spervuur beland weens bewerings dat hy sy Sandton-huis van R3,6 miljoen gesloop het om plek te maak vir sy nuwe “paleis” van sowat R16 miljoen.
Hy besit glo nog ’n huis buite Polokwane wat hy in 2007 vir R1 miljoen kontant gekoop het en City Press het onlangs beweer hy het ’n deel van ’n plaas vir R900 000 kontant gekoop.
– Volg Nuus24 op Twitter
- Beeld