Malema wil sy saak skrap
2009-08-31 12:54
Johannesburg – Die ANC-jeugliga se president, Julius Malema, se prokureur het aansoek gedoen dat die gelykheidshof sy haatspraak-klag moet skrap.
Malema se haatspraak-klag is vandag voortgesit in die gelykheidshof.
Tumi Mokwena, Malema se prokureur, het Maandag gesê die klag is gebaseer op een aanmerking wat Malema gemaak het en nie op die hele stelling nie.
Die Sonke Gender Justice Network het ’n klag van haatspraak, diskriminasie en teistering teen Malema gelê oor sy kommentaar oor ’n vrou wat pres. Jacob Zuma van verkragting aangekla het.
Malema het glo gesê Khwezi (skuilnaam van die klaer) het ’n “lekker tyd” gehad. “As ’n vrou dit (seks) nie geniet nie, loop sy vroeg in die oggend. Diegene wat dit geniet het, wag totdat die son opkom en vra vir ontbyt en taxigeld.
“Die oggend het dáái vrou ontbyt en taxigeld gevra,” het hy glo gesê. “Jy kan nie taxigeld vra van iemand wat jou verkrag het nie.”
Die Sonke Gender Justice Network eis ’n verskoning en R50 000 skadevergoeding wat aan ’n skuiling vir mishandelde vroue betaal sal word.
Mokwena het vroeër verduidelik dat Malema se aanmerkings gebaseer is op dié van die regter wat Zuma in 2006 vrygespreek het, maar die verslae van Malema se aanmerking het nie die voorafgaande stelling dat hy vroueregte ondersteun, ingesluit nie.
“Daar is nie ’n manier waarop die hof tot ’n gevolgtrekking kan kom as hulle nie die volle konteks van Malema se toespraak verstaan nie.”
Hy het weer beklemtoon dat hy Lisa Vetten, ’n senior navorser by die Tshwaranang Legal Advocacy Centre, se verklaring verwerp op gronde dat sy nie 'n kwalifikasie in sielkunde het nie.
Chris Todd, die Sonke Gender Justice Network se prokureur, het dié aansoek verwerp.
Hy het gesê as openbare figuur moes Malema sensitief gewees het oor wat hy gesê het.
Todd het gesê Vetten se verklarings is al in baie howe aanvaar.
Die verhoor duur voort.
– Sapa