Malema vandag weer in hof
2009-09-21 10:06
Johannesburg - Julius Malema, leier van die ANC-jeugliga, sal na verwagte vandag op aanklagte van haatspraak in die gelykheidshof onder kruisverhoor geplaas word.
Die klag deur die Sonke Gender Justice Network kom nadat Malema in die publiek verklaar het dat die vrou in die Zuma verkragtingsaak “’n lekker tyd” gehad het.
Landdros Colleen Collis het verlede maand die klag van diskriminasie teen Malema geskrap, maar het benadruk hy moet steeds op die klagte van haatspraak en teistering voorkom.
Malema is vasberade om nie vir die uitspraak om verskoning te vra nie en dring daarop aan dat hy buite konteks aangehaal is.
Hy het in Januarie voor studente van die Kaapse Skiereiland Universiteit van Tegnologie gesê: “Diegene wat ‘n lekker tyd gehad het, sal bly tot die son opkom en vra vir ontbyt en taxi-geld.”
“Dié oggend het dáái vrou ontbyt en taxigeld gevra.”
Malema het verwys na ‘n verkragtingsaak teen Jacob Zuma, waarvan hy vrygespreek is voor hy president geword het.
Sonke Gender Justice Network het gesê dat sulke uitsprake mites rondom verkragting laat voortbestaan.
Dit ondermyn hulle pogings om jongmense in te lig oor verkragting en om sodoende seksuele geweld te voorkom.
Hulle dring daarop aan dat Malema om verskoning vra en eis R50 000 in skadevergoeding.
Die geld sal aan ‘n skuiling vir mishandelde vroue geskenk word.
- Sapa