Malema stuur dreig-SMS aan Cronin
2009-12-13 14:42
Johannesburg – Die president van die ANC-jeugliga, Julius Malema, het ‘n dreigende SMS aan Jeremy Cronin, die SAKP se adjunk-sekretaris-generaal, gestuur ná ‘n vernederende verskyning van Malema by ‘n SAKP-konferensie, het City Press Sondag berig.
“As jy dink jy het vir my ‘n les geleer, wag tot jy sien wat kom in jou rigting,” het Malema glo vir Cronin per SMS gestuur nadat hy by die SAKP se konferensie in Polokwane uitgejou is.
City Press berig verskeie leiers binne die ANC en die SAKP het die SMS bevestig.
Cronin wou nie die SMS aan City Press bevestig nie en het net Malema se taalgebruik as “nogal los” beskryf. “Ek ignoreer daardie soort ding.”
“Ons wil ‘n konstruktiewe verhouding hê, nie met die individue nie, maar met die ANCYL in die geheel,” het Cronin gesê.
Cronin en Malema het verlede maand vyandige woorde gewissel. Cronin het in die SAKP se nuusbrief gesê diegene wat wil hê myne moet nasionaliseer, soos Malema, verstaan nie die ekonomie van die kwessie nie.
Malema het teruggevuur en Cronin as ‘n “wit messias” beskryf.
Nie die ANCYL of die SAKP kon vir kommentaar bereik word nie.
- Sapa