Malema steel kalklig by ANC-opskop
2010-01-10 07:05
Suné Kitshoff
Johannesburg - Die omstrede ANC-jeugleier, Julius Malema, het die kalklig gesteel tydens die regerende party se 98ste verjaardag-opskop in Kimberley die afgelope twee dae.
Ursula Chikane, die gasvrou op ’n dinee Vrydagaand in die Galeshewewoonbuurt, het selfs ’n bietjie Malema-glans probeer steel met ’n grappie wat verwys na sy reputasie as ’n jaagduiwel.
Sy het vertel sy moes op kort kennisgewing van Johannesburg na Kimberley ry omdat haar vlug gekanselleer is.
Dit het nie gelyk of sy betyds in Kimberley sou wees nie omdat sy “met wetsgehoorsaamheid gestraf is”.
Sy besluit toe maar om “haar lyf Juju (Malema se bynaam) te hou” en versnel toe van haar “normale” 80 km/h tot 154 km/h.
Toe ’n verkeersbeampte haar van die pad aftrek, kyk sy op na hom en sê met ’n glimlag: “Weet jy nie wie ek is nie? Ek is Julius Malema.”
Malema, wat naby pres. Jacob Zuma in die voorste gestoeltes gesit het, het geskaterlag.
Ook die Gautengse premier en mede-gasvrou, Nomvula Makonyane, het spesiale erkenning aan Malema gegee. Sy het elke spreekbeurt tydens die dinee begin met die woorde: “Wees gegroet, Julius.”
By gister se vergadering is Malema luid deur die duisende toeskouers toegejuig.
Hy het oudergewoonte die geleentheid gebruik om ’n stekie in te kry.
Dié keer was dit na die “super-revolusionêre”, ’n bedekte verwysing na die SAKP.
- Rapport