Malema skel glo verkeersbeamptes uit
2009-11-01 08:03
Piet Rampedi en Moffet Mofokeng
Johannesburg - Nege verkeersbeamptes van Limpopo is glo in die pekel nadat hulle dit gewaag het om mnr. Julius Malema, ANC-jeugleier, se spoggerige Range Rover van die pad te trek weens ’n spoedoortreding.
Só sê twee verkeersbeamptes wat op 14 Oktober op die toneel was toe Malema glo senior politici gekontak het om hom te kom help.
Die betrokke verkeersbeamptes het ook opdrag van die provinsiale departement gekry om skriftelike verklarings af te lê oor waarom hulle “mnr. Malema so sleg behandel het” op die pad tussen Polokwane en Seshego – sy tuisdorp.
Volgens die twee verkeersbeamptes het hulle die motor gesien toe dit daardie Woensdagmiddag na die hoofverkeersirkel in Seshego op pad was. Hulle het glo aan die bestuurder beduie om stil te hou, maar hy het sy ligte bloot begin flikker.
Malema se bestuurder het glo in die middel van die pad stilgehou, waarop Malema en die ander insittendes uitgespring en die verkeersbeamptes begin uittrap het.
Malema het hulle glo toegesnou: “Wie dink julle is julle? Besef julle nie ek is Julius, president van die jeugliga, nie? Ek weet van julle haat my.”
Hy het glo hierop verskeie senior ANC-lede en regeringslui gebel en gesê hulle moet hul ondergeskiktes “dissiplineer”.
Volgens die verkeersbeamptes het Malema ook mnr. Pinkie Kekana, LUR vir vervoer, gebel. Hy het glo op sy beurt mnr. Ntau Letebelele, departementshoof, gekontak, wat mnr. Walter Sathekge, verkeersbestuurder, opdrag gegee het om na die toneel te gaan.
Daar aangekom het Sathekge glo die verkeersbeamptes gevra om die omstandighede betreffende die herrie te verduidelik.
Sathekge wou nie verlede week hierop kommentaar lewer nie en het sy selfoon vir mnr. Wisani Ngobeni, departementele woordvoerder, gegee.
Die verkeersbeamptes beweer die departement het hulle die volgende dag per brief versoek om geskrewe verklarings af te lê oor die manier waarop Malema behandel is.
Die nege verkeersbeamptes het toe glo gesamentlik ’n brief geskryf waarin hulle geweier het om verklarings af te lê sonder ’n geskrewe klag van Malema.
“Ons kan nie reageer op mondelingse klagtes van Julius nie. As Julius gekla het, moet hulle vir ons ’n brief wys waarin hy verduidelik wat gebeur en hoe ons hom sleg behandel het.”
Malema was gister woedend toe Rapport se susterskoerant City Press hom gekontak het. Hy het die bewerings as “gemors” afgemaak.
“Ek gee nie om vir julle nie,” het Malema gesê. “Wena (jy) veral, jy sal niks aan my doen nie…
“Jy is ’n klein seuntjie. Jy mag my nooit weer kontak vir kommentaar nie. Ek wil nooit weer jou lelike stem op my selfoon hoor nie.”
Ngobeni het in reaksie op ’n navraag van City Press gesê die bewerings is “bespiegelend” en dat die vrae “onlogies” is.
Volgens Ngobeni het die departement geen rekord van só ’n voorval nie, wat beteken “dit het waarskynlik nooit gebeur nie”.
- Rapport