Malema sê wie hý soek vir Bafana-breier
2009-10-20 11:52
Johannesburg - Die omstrede president van die ANC-jeugliga, Julius Malema, sê Lucas Radebe is sy eerste keuse vir Bafana-breier.
"Ons het die president van die Suid-Afrikaanse Sokkervereniging (Safa) gesê Joel Santana moet waai," het Malema gesê.
Joel Santana het Maandag, agt maande voor die 2010-Wêreldbeker-toernooi, bedank.
Die jeugliga wil egter nie nie hê die Brasiliaan, Carlos Alberto Parreira moet na die posisie wat hy verlede jaar verlaat het, terugkeer nie.
Parreira se naam is reeds in die hoed gegooi vir Santana se opvolger.
"As Parreira terugkeer, sal dit 'n terugslag wees. Ons (Bafana Bafana) het met die plaaslike afrigters gewen. Ons het niks gewen met die buitelandse afrigters nie. Ons het dié punt duidelik gemaak aan Safa," het Malema aan joernaliste in Johannesburg gesê.
Malema sê as die nasionale sokkerspan met 'n plaaslike afrigter verloor het, was dit ten minste op 'n "waardige" manier.
Op die vraag of hy enige iemand in gedagte het, het Malema gesê Bafana Bafana kan 'n "soliede" span vorm met 'n afrigter soos Lucas Radebe.
Radebe is die voormalige kaptein van Bafana Bafana. Hy het ook in Engeland gespeel. Hy het egter nog nie spanne afgerig nie.
"Lucas spreek homself duidelik en onafhanklik uit. Hy laat hom nie voorsê van enige iemand in die sokkergemeenskap nie."
Malema het dit ook duidelik gemaak dat hy nie 'n "ou man" as afrigter wil hê nie.
"Hoekom sal die span 'n afrigter soos Shakes Mashaba, Jomo Sono of Clive Barker soek? Hulle is oud. Kom ons gee die jonges 'n kans om te wys wat in hulle steek."
– Sapa