Malema se uitlatings skokkend, sê Lekota
2011-05-10 09:22
Upington - Die uitlatings van Julius Malema, ANC-jeugligaleier, dat wit mense misdadigers is, het hom geskok.
Met pres. Jacob Zuma en Malema saam stuur Suid-Afrika op ’n ramp af, het Mosiuoa Lekota, nasionale Cope-leier, Maandag hier aan sakelui gesê. Volgens hom is die land onder die ANC in dieselfde rigting as soveel ander Afrika-lande op pad.
Die ANC het ’n bedreiging vir almal in die land geword, en is vrot “van die kop af”.
Lekota het Maandag met ’n blitstoer deur die Noord-Kaap begin wat tot vandag duur.
Lekota het op die Internasionale Lughawe Upington aan sakelui gesê korrupsie het die regering oorgeneem. “Ons het eintlik nou geen regering nie.”
“Elke tender wat toegeken word, dui aan dat daar ’n netwerk is wat bepaal wie dit gaan kry. Op provinsiale vlak in die Noord-Kaap weet ons wat die situasie is met onder andere John Block. In die Vrystaat is die vlak van korrupsie verstommend.”
Block is die Noord-Kaapse ANC-voorsitter en LUR vir finanies, ekonomie en toerisme wat van bedrog en rampokkery aangekla word.
Lekota het verwys na onder meer ’n reis van Nosiviwe Mapisa-Nqakula, minister van korrektiewe dienste, en andere, na New York sonder dat sy ’n enkele vergadering bygewoon het van die beraad waarheen sy gegaan het.
“Daar is nog geen verklaring van die regering of die geld teruggekry gaan word nie.”
Hy het ook verwys na die skuldigbevinding aan dwelmsmokkelary van Sheryl Cwele, vrou van Siyabonga Cwele, minister van staatsveiligheid. Zuma het geweet van die aanklagte teen haar toe hy haar man as minister aangestel het.
“Hoeveel ander mense in die regering is betrokke by die dwelmbedryf?”
Malema se uitlatings in Kimberley wys hoe die ANC van die oorspronklike pad afgewyk het. “Ek loop die pad van (Nelson) Mandela. Suid-Afrika behoort aan ons almal, en ons moet almal saamwerk.
“Zuma en Malema se pad verskeur ons, en voorspel ’n ramp vir Suid-Afrika. Die ANC is ’n groot bedreiging vir Suid-Afrika.”
Hy het Cope as die enigste alternatief vir die ANC bestempel.
- Volksblad