Malema se tuisdorp juig ná sy skorsing
2011-11-11 10:07
Johannesburg – Seshego, die tuisdorp van Julius Malema, afgedankte president van die ANC-jeugliga, het die nuus van sy vyf jaar lange skorsing gevier, het The Times Live Vrydag berig.
Volgens dié webwerf het konvooie motors deur die strate van die township, buite Polokwane, gery met mense wat by die vensters uithang.
"Dis verby met Malema. Daar sal vrede in Suid-Afrika wees," het 'n groep inwoners gesing.
'n Inwoner wat anoniem wou bly, het gesê: "Ons het genoeg gehad van Malema en sy groep, wat liewer na hul eie belange omsien eerder as dié van diegene wat hulle aan bewind gestem het. Hy moes geweet het die wiel draai."
Nóg 'n inwoner het gesê: "Ons wil hê Sello Moloto moet Limpopo lei omdat daar 'n leierskapvakuum is".
Malema is tot effektief vyf jaar geskors.
Hy is skuldig bevind op die eerste aanklag dat hy verdeeldheid saai in die party nadat hy gesê het die Afrika-unie (AU) en die Suider-Afrikaanse Ontwikkelingsgemeenskap (SAOG) is van koers af sedert oudpres. Thabo Mbeki nie meer staatshoof is nie. Hy is ook skuldig bevind op aanklag dat hy die ANC in oneer bring oor sy uitlatings oor Botswana. Malema is egter onskuldig bevind op aanklag van rassisme oor uitlatings wat hy in Mei op 'n saamtrek gemaak het.
– Volg Nuus24 op Twitter
- SAPA