Malema se prokureur bevestig lasbrief

2012-09-21 23:00

Johannesburg – Julius Malema se prokureur het Vrydag bevestig dat 'n lasbrief vir sy inhegtenisneming uitgereik is.

"Ons het bevestiging van die owerhede ontvang dat daar 'n lasbrief uitgereik is vir Mnr. Malema," het Nicqui Galaktiou van Brian Kahn Prokureurs aan City Press gesê.

Sy het gesê die regspan het nog nie self die lasbrief gesien nie, maar is besig om Malema se hofverskyning vir volgende week met die owerhede te bespreek. 

Galaktiou het bygevoeg dat hulle die lasbrief "waarskynlik eers na die naweek" sal sien.

Malema sal na verwagting in Pretoria of Polokwane op aanklagte van korrupsie, bedrog en geldwassery in die hof verskyn. 

Die voormalige leier van die ANC-jeugliga het die afgelope week weer gesê hy sal in die hof verskyn as hy aangekla word.

Die saak hou verband met Malema se Ratanang Familietrust en sy aandeelhouding in On-Point Engineering, ‘n maatskappy wat miljoene gemaak het uit tenders van die regering in Limpopo.

Lees verder.

Volg Nuus24 op Twitter.

– City Press