Malema se heraanstelling nié bespreek
2012-12-20 08:00
Bloemfontein – Julius Malema, voormalige president van die ANC-jeugliga, se versoek om sy heraanstelling gaan nie in Mangaung bespreek word nie, het Gwede Mantashe, sekretaris-generaal van die ANC, gesê.
Malema se brief om sy werk terug te vra was te laat vir die program van die ANC se nasionale konferensie, het Mantashe aan joernaliste in Bloemfontein gesê.
Mantashe het gesê die brief is op 16 Desember – die eerste dag van die ANC se nasionale verkiesingskonferensie – ingedien.
Malema, die voormalige woordvoerder van die ANC-jeugliga Floyd Shivambu en die geskorste sekretaris-generaal Sindiso Magaqa, het die ANC se nasionale kongres gevra om die besluit deur die party se tugkomitee (NTK) omver te werp en hulle weer in hul onderskeie posisies aan te stel, het die Mail & Guardian Maandag berig.
"Ons is steeds lojale ondersteuners en lede van die ANC en is bereid om onder sy beginsels reggestel en gelei te word," het die drie in 'n gesamentlike verklaring gesê.
Die drie het ook onderneem om hulle in die toekoms beter te gedra.
Die trio het gesê hulle het nie hulself tot die hof gewend nie, omdat hulle glo die nasionale konferensie moet die tugproses hersien wat tot hul skorsing gelei het.
Mantashe het gesê die Malema-kwessie is deur die party se tugstrukture "afgehandel".
Hy het erken dat die kwessie op die konferensie bespreek kon word, maar die brief is te laat ingedien.
– Volg Nuus24 op Twitter
- SAPA
