Malema se grondwetlike reg geskend – Shilowa
2012-09-18 17:26
Johannesburg – Cope se faksieleier, Mbhazima Shilowa, het Dinsdag sy kommer uitgespreek oor die verbanning van Julius Malema by ‘n stadion in die Noordwes.
“Die verbanning van die eertydse president van die ANC-jeugliga, Julius Malema, deur die Suid-Afrikaanse polisiemag om by Wonderkop-stadion in Marikana in te gaan om met stakende werkers te praat, moet op die sterkste wyse deur alle demokrate veroordeel word,” het Shilowa gesê.
‘n Woedende Malema is afgeneem waar hy deur die polisie voorgekeer en aangesê is om die gebied te verlaat.
Malema het beweer hy was uitgenooi voordat hy uiteindelik na sy motor teruggedwing is en deur die polisie uit die dorp vergesel is.
‘n Polisiewoordvoerder het vroeër gesê hy sal die redes uitklaar vir Malema se verbanning, maar niks het nog vorendag gekom nie.
Biskop Joe Seoka, voorsitter van die Suid-Afrikaanse Raad van Kerke, het vroeër gesê hy het aansoek gedoen vir toestemming om tydens die saamkoms te praat.
Die terme was dat mense wat die byeenkoms bywoon, ‘n wit T-hemp dra sodat hulle geïdentifiseer kan word as deel van die groep wat veronderstel is om daar te wees.
Nietemin het nie almal die regte klere gehad nie en die vergadering het langer geneem as wat verwag is.
Geen beperking is geplaas op wie dit mag bywoon of wie mag praat nie, het Seoka gesê.
Shilowa het gesê: “Die Suid-Afrikaanse grondwet waarborg almal van ons, insluitend Malema, die regte om enige byeenkoms in Suid-Afrika sonder voorbehoud te mag toespreek binne die perke van die wet.”
Hy sê die polisie het geen wet of hofbevel genoem toe hulle Malema hierdie fundamentele regte geweier het nie.
– Volg Nuus24 op Twitter
- SAPA
