Malema-skorsing effektief in werking
2012-02-04 15:00
Johannesburg – Julius Malema, geskorste leier van die ANC-jeugliga, en ander leiers van die jeugliga se appèl teen hul skorsing het misluk, het Cyril Ramaphosa, voorsitter van die ANC se nasionale tug-appèlkomitee, aangekondig.
Ramaphosa het Saterdag dié aangekondig op 'n mediakonferensie by Luthuli-huis gemaak. Die mediakonferensie het omstreeks 13:40 begin, nadat dit aanvanklik vir 11:30 geskeduleer was.
Malema kan sy skorsing uit die party in 'n hof betwis. Maar die skorsing tree effektief in werking.
Die jeugliga het ondermeer aangevoer dat daar 'n hele aantal ongerymdhede was in die tugproses.
Die jeugliga het gesê een van die ongerymdhede wat daar was, is dat Derrick Hanekom, Susan Shabangu en Collins Chabane hulself aan die tugproses moes onttrek. Ramaphosa het gesê dié argument was ongegrond.
Malema het tereggestaan op aanklagte dat hy die ANC in oneer bring en verdeeldheid saai in die range van die regerende party. Malema is ook aangekla oor sy uitlatings oor ’n regimeverandering in Botswana. Hy is skuldig bevind en 'n skorsing van vyf jaar opgelê.
Malema, Floyd Shivambu, Ronald Lamola, adjunkleier van die jeugliga, Sindiso Magaqa, sekretaris-generaal, Kenetswe Mosenogi, adjunk-sekretaris-generaal, en Pule Mabe, tesourier-generaal is ook daarvan aangekla dat hulle ongenooid by 'n vergadering van die ANC opgedaag en dié vergadering ontwrig het.
Hulle is skuldig bevind op dié aanklag en twee jaar geskors. Die skorsing is opgeskort vir 'n tydperk van drie jaar.
Die appèl teen dié skorsing op dié aanklag was suksesvol.
Shivambu se appèl, wat verband hou met 'n aanklag dat hy 'n joernalis gevloek en 'n verklaring wat hy uitgereik het, het ook misluk.
– Volg Nuus24 op Twitter
- Nuus24