Malema se appèl begin môre in Luthuli-huis
2012-01-22 09:11
Johannesburg – Julius Malema, geskorste ANC-jeugleier, sal Maandag in Luthuli-huis in Johannesburg wees om sy vyf jaar lange skorsing uit die ANC te beveg.
Die ANC se appèlkomitee onder voorsitterskap van Cyril Ramaphosa, lid van die nasionale uitvoerende komitee, sal besluit hoe lank die verhoor sal voortduur.
Malema voer onder meer in sy appèlaansoek aan die ANC se nasionale tugkomitee (NTK) het Tokyo Sexwale, minister van huisvesting, “ongevraagd beledig” toe hy tydens die tugverhoor vir hom getuig het.
“Daar was geen gronde vir die ongevraagde belediging teenoor kameraad Sexwale dat sy getuienis ‘aan die absurde’ gegrens het nie,” lui Malema se betoog. Volgens Malema het Sexwale ’n beter begrip van die ANC se grondwet as enige van die ander getuies in die tugverhoor.
Malema se betoog berus grotendeels daarop dat die NTK hom nie die reg gegun het om om versagtende omstandighede te pleit nie; en ingevolge ’n wysiging van die ANC-jeugliga se grondwet is ’n skorsing uit die ANC nie noodwendig op die ANC-jeugliga van toepassing nie en is die jeugliga ’n outonome struktuur.
Volg Nuus24 op Twitter
- Rapport