Malema se Zim-uitsprake ‘laaste strooi’ vir Zuma
2010-04-12 06:28
Philda Essop
Kaapstad - Julius Malema se omstrede uitsprake oor Zimbabwe was die laaste strooi vir pres. Jacob Zuma.
Sy steun vir pres. Robert Mugabe se Zanu-PF-party in die komende Zimbabwiese verkiesing het die bemiddelingsproses erg vir Zuma bemoeilik, het prof. Dirk Kotzé, politieke kundige aan Unisa, gister gesê.
Zuma het eergister gesê Malema se optrede en uitsprake is “totaal vreemd vir die kultuur van die ANC”.
Volgens Kotzé is sukses in die Zimbabwiese onderhandelings baie belangrik vir Zuma. “Sukses beteken dat Zuma die respek en aansien wat hy oor die afgelope paar maande verloor het, kan terugwen. Deur te sê die ANC steun slegs een party in Zimbabwe, was die laaste strooi vir Zuma.”
Kotzé glo dit gaan vir Malema moeilik wees om voortaan sy uitsprake af te water. “Daar was egter ’n duidelike wending in die top leierskap van die ANC – as hy voortgaan, gaan hy moeilikheid kry.”
Malema het vroeër ook onder skoot gekom vir die sing van die strydlied “Skiet die boer” en omdat hy ’n BBC-joernalis uit ’n perskonferensie van die ANC-jeugliga gejaag het.
Prof. Susan Booysen, politieke kundige aan die Universiteit van Johannesburg, meen egter nie een sterk teregwysing gaan Malema stilmaak nie.
“Dit is min dat die ANC sulke teregwysings in die openbaar laat uitspeel.”
- Die Burger