Malema sal vandag om versagting pleit
2012-02-13 08:00
Kaapstad – Die geskorste ANC-jeugligaleier, Julius Malema, kry Maandag kans om redes aan te voer oor waarom sy skorsing van vyf jaar uit die ANC versag moet word. Dit geld ook die woordvoerder van die jeugliga, Floyd Shivambu.
Die ANC se nasionale dissiplinêre appèlkomitee (NDAK) het sowat twee weke gelede aangekondig dat Malema en Shivambu se appèl teen hul skuldigbevinding in November misluk het.
Cyril Ramaphosa, voorsitter van die komitee, het egter ’n versoek van hulle toegestaan om versagtende omstandighede voor die NTK te bring. Die ANC sal ook verswarende omstandighede kan aanvoer. Dit beteken hul straf kan verlig of verswaar word.
Derek Hanekom, voorsitter van die ANC se nasionale tugkomitee (NTK), het Sondag bevestig dat die proses Maandag voortduur. Dit is onduidelik hoe lank die proses sal wees.
Prof. Susan Booysen, politieke ontleder aan die Universiteit van die Witwatersrand, het Sondag gesê die ANC sal probeer om die skorsing op vyf jaar te hou.
“Uit ’n politiek strategiese oogpunt het die Zuma-kamp oorwinning gesmaak en hulle sal dit wil beskerm. Ek dink as hulle vermoed ’n ligter straf word oorweeg, sal hulle ingaan met verswarende omstandighede.”
Prof. Amanda Gouws van die departement politieke wetenskap aan die Universiteit Stellenbosch, het gesê die saak kan “enige kant” toe gaan.
“Die ANC het Malema toegelaat om versagtende omstandighede aan te voer, maar die party mag ook verswarende omstandighede opper. Dit beteken sy vonnis kan selfs verswaar word. Ek dink die appèlkomitee sal sy getuienis aanhoor, maar sy vonnis van ’n skorsing van vyf jaar sal bly staan.”
Malema gaan luidens ’n City Press-berig glo aanvoer dat sy vonnis vir die 2010-verhoor nie “selektief” toegepas kan word nie.
Pres. Jacob Zuma het in ’n onderhoud aan dié Sondagblad gesê hy kan “nie bespiegel” oor waarom drie sanksies van Malema se 2010-verhoor nie toegepas is nie.
Hieronder tel ’n boete van R10 000, woede-beheerklasse en politieke opvoeding.
Die ANC se nasionale tugkomitee het Malema in November vir vyf jaar uit die party geskors. Ingevolge sy 2010-vonnis kan hy uit die party geskors word indien hy binne twee jaar daaraan skuldig bevind word dat hy verdeeldheid in die party saai.
Volg Nuus24 op Twitter
- Die Burger