Malema sal g’n aftree, sê biograaf
2011-11-29 09:00
Kaapstad – “Julius Malema sê hy wil ’n beesboer word. Hy is klaar met politiek. Hy tree uit. Ek sê nonsens,” het Fiona Forde, die skrywer van Malema se ongemagtigde biografie, An Inconvenient Youth, Julius Malema and the ‘New’ ANC, gesê.
Forde het Maandag ’n woelige gehoor by die Universiteit van Kaapstad se bestuurskool toegespreek.
“Malema is te honger na mag, te veel van ’n vegter en te jonk om nou te wil aftree. Hy sal doen wat hy tot dusver gedoen het: die massas bymekaar jaag om agter hom te staan wanneer die tyd ryp is vir hom om weer aktief tot die politiek toe te tree. Die vraag nou is eerder hoe hy sy saak gaan veg? Wie gaan hulle agter hom skaar? Wie gaan hom as die leier van hul kiesafdeling wil hê?”
Want die punt is, het sy gesê, in drie jaar het omstandighede in dié land ’n Malema opgelewer en al is hy geskors, het niks omtrent dié omstandighede verander nie.
“Daar is steeds armoede, korrupsie, swak onderwys, ’n land verdeel volgens ras en sosio-ekonomiese groeperings en daar is steeds geen leiding óf visie van regeringskant nie. Dit is alles elemente wat Malema met groot vaardigheid (en briljante strategie, as in ag geneem word hy het dit as 28-jarige sonder noemenswaardige lewenservaring reggekry) gemanipuleer het om sy sin te kry: om voor te gee hy is die stem vir die stemlose massa. Dit het hom politieke mag gegee, status en rykdom. Hy het die simbool geword van ’n “nuwe” ANC.
“Dít is wat op die ou end sy ondergang beteken het,” het Forde gesê. “Malema het toegelaat dat sy arrogansie handuit ruk. Hy het sy rykdom, sy blink leefstyl, sy mag onder almal se neuse gevryf.
“Malema is nie deur die moedermaatskappy gedissiplineer nie. Hy is opsy geskuif omdat hy vir die leiers ’n bedreiging geword het.”
Vrae of Malema ’n Robert Mugabe of selfs Hitler is, het Forde afgewys met: “Om te verstaan waar Malema vandaan kom, moet ’n mens die kompleksiteit van Suid-Afrika verstaan – ’n land met ’n Eerstewêreld-ekonomie en Derdewêreld-realiteit; waar nog géén gesprek oor ware transformasie was nie.”
– Volg Nuus24 op Twitter
- Die Burger