Malema sal ANCYL-lekgotla toespreek
2012-02-08 17:53
Johannesburg – Julius Malema, leier van die ANC-Jeugliga, sal die organisasie se Nasionale Uitvoerende Komitee (NUK) en die media toespreek by die opening van die lekgotla in Pretoria vandeesweek.
Floyd Shivambu, ANCYL-woordvoerder, het gesê die liga se eerste vergadering van die NUK vanjaar sal Donderdag gehou word.
“Die gewone NUK-vergadering sal die organiserende en politieke ontwikkeling en vordering van die ANCYL sedert die vorige gewone vergadering in Julie 2011 bespreek,” het hy Woensdag in ‘n verklaring gesê.
Die liga se jaarlikse NUK-lekgotla sal van 10 tot 12 Februarie gehou word by die St. George Hotel in Pretoria.
“Julius Malema, president van die ANCYL, sal die lekgotla Vrydag open... wat bygewoon sal word deur al vyf top-beamptes van die ANCYL in die provinsies en drie leiers van die ANCYL per streek,” het Shivambu gesê.
Die ANC se nasionale dissiplinêre appèlkomitee (NDAK) het onlangs aangekondig Malema en sy woordvoerder, Floyd Shivambu, se appèl teen hul skuldigbevinding verlede jaar het misluk. Vier ander ANCYL-beamptes is ook skuldig bevind.
Hulle is daaraan skuldig bevind dat hulle die ANC in oneer gebring het en verdeeldheid in die party gesaai het.
Gwede Mantashe, sekretaris-generaal van die ANC, het gesê die ses se skorsing sal eers in werking tree nadat die vonnisse gefinaliseer is. Malema het 14 dae om versagtende omstandighede voor die ANC se nasionale tugkomitee te bring.
- Volg Nuus24 op Twitter
- SAPA