Malema-sakebelange lei glo tot hoë se skorsing
2011-11-09 09:06
Johannesburg – Julius Malema, leier van die ANC-jeugliga, se sake-tentakels, wat nou glo selfs tot in Mpumalanga strek, het verlede Vrydag daartoe gelei dat die bestuurshoof van die reeds sukkelende departement van gesondheid geskors is.
Dr. Jerry Mahlangu is verlede week glo summier deur premier David Mabuza geskors omdat hy (Mahlangu) na bewering ’n tender toegeken het aan ’n maatskappy waarin Malema belange het.
Lebona Mosia, woordvoerder van Mabuza, het Dinsdag bevestig dat nog niemand in Mahlangu se pos waarneem nie.
Bykans ’n week ná Mahlangu se skorsing swyg Mabuza steeds oor die saak.
Mahlangu is glo geskors nadat Isibo-nelo Waste Solutions ’n tender van R120 miljoen gekry het vir die verwydering van mediese afvalmateriaal by hospitale.
Nie die gesondheidsdepartement óf die premierskantoor wou gister sê watter probleme, indien enige, met dié tender bevind is nie. “Ons wag nog op Mabuza se leiding,” het Mosia Dinsdag gesê.
Die Sowetan, wat anonieme bronne in die departement van gesondheid aanhaal, het die naweek berig Mabuza het glo ’n ander voorkeurkandidaat gehad vir die tender, maar dat Mahlangu hom teëgegaan en Isibonelo aangestel het.
Malema se bande met Isibonelo kom glo via Christos Eleftheriades, ’n mede-aandeelhouer van die maatskappy. Eleftheriades en Malema is albei betrokke by Tshumisano, ’n Limpopo-maatskappy wat vroeër ’n tender van R20 miljoen gekry het vir die verwydering van mediese afval in die provinsie.
“Die gesondheidsdepartement is al in ’n erge krisis. Met Mahlangu, een van die beste departementshoofde in Mpumalanga, se skorsing is dit rigtingloos ook,” het die DA gesê.
Mahlangu het Dinsdag nie op Beeld se versoeke om kommentaar gereageer nie.
– Volg Nuus24 op Twitter
- Beeld