Malema-saak 'nie deur brand by hof geraak'
2012-10-20 11:45
Johannesburg – Die brand wat ‘n gedeelte van die Polokwane-landdroshof vernietig het, sal nie die saak van geldwassery teen Julius Malema, die geskorste leier van die ANC-jeugliga, raak nie, het die departement van justisie Saterdag gesê.
“Geen van die polisieverklarings wat verband hou met daardie saak was naby die hof nie,” het Mthunzi Mhaga, woordvoerder van die departement, gesê.
“Ons moet nog ‘n assessering van die skade rakende hofdokumente voltooi, maar mense moenie paniekerig wees nie.”
Malema het op 26 September in dié hof verskyn op ‘n aanklag van geldwassery. Hy is op borgtog vrygelaat en sal na verwagting op 30 November weer in die hof verskyn.
Mhaga sê saak-lêers kan maklik weer hersaamgestel word as hulle in die brand vernietig was.
Verklarings kan weer geneem word en verslae van hospitale of lykshuise kan weer ingesamel word.
Dieselfde geld vir sake wat nog net gedeeltelik aangehoor is.
Sake sal na ‘n ongebruikte hofsaal by die hooggeregshof in Limpopo verwys word as ‘n tydelike maatreël.
‘n Vergadering van alle belanghebbendes, insluitend die departement van openbare werke, sal oor die naweek plaasvind om te verseker dat geregtigheid geskied.
Mhaga sê hulle wag nog vir die forensiese verslag oor die werklike oorsaak van die brand en oor vir ‘n assessering van die skade.
– Volg Nuus24 op Twitter
- SAPA
