Malema reg vir oorlog
2009-12-15 12:46
Pretoria - Die ANC-jeugliga gaan enige pogings wat deur “gulsige geel kommuniste” aangewend word om die party oor te neem, bestry, het Julius Malema gesê.
“Indien die uitjouery ‘n aanduiding van die begin van ’n oorlog was, aanvaar ons die uitnodiging,” het Malema, die president van die jeugliga gesê met verwysing na die koue ontvangs wat hulle oor die naweek by die Suid-Afrikaanse Kommunistiese Party (SAKP) se kongres in Polokwane gekry het toe hy voor 'n skare uitgejou is.
Hy het Dinsdag aan die Nasionale Persklub van Pretoria gesê die leiers van die SAKP het korrup geraak en moet ’n les geleer word.
“Die geel ("yellow" - bedoelend lafhartig) kommuniste word deur gulsigheid gedryf. Hulle sing anti-korrupsie liedjies, maar hulle is self korrup. Alles omtrent die feit dat die SAKP die ANC wil oorneem is verkeerd.
"Hulle moet herinner word aan karakter, want om ander uit te jou toon nie baie karakter nie," het hy gesê.
Nadat Malema en Billy Masetlha by die SAKP-byeenkoms uitgejou is, het Malema na bewering vir Gwede Mantashe, die sekretaris-generaal van die ANC gevra wie nog ‘n voorsitter van die SAKP is.
Malema wou afgevaardigdes toegespreek het, maar sy versoek is afgekeur en hy het geloop.
Dit het aanleiding gegee tot ’n vurige debat tussen die ANC-jeugliga en die SAKP.
- Sapa