Malema reg om Zuma te pak
2011-08-29 09:06
Johannesburg - Die politieke oorlewingstryd tussen pres. Jacob Zuma en Julius Malema, ANC-jeugleier, het in alle erns begin.
Die ANC-jeugliga is aan die laer trek rondom Malema en “duisende” van sy ondersteuners gaan na verwagting vandag reeds na Luthuli-huis opruk om te eis dat die tugstappe teen hul beleërde leier laat vaar word.
Malema en sy adjunk, Floyd Shivambu, word daarvan beskuldig dat hulle die ANC se naam deur die modder gesleep het toe hulle onlangs gedreig het om die regering van Botswana omver te werp.
Die jeugliga het die naweek landwyd sy lede gemobiliseer om Malema en Shivambu te ondersteun en haastig vergaderings is in talle groot stede gehou.
Dít in vergelyking met ’n betreklik lae profiel wat deur die Zuma-kamp gehandhaaf is.
In die Wes-Kaap het ondersteuners van die jeugliga in Nyanga vergader. ’n Woordvoerder, Jabu Mfusi, het die ANC daarvan beskuldig dat hy vergeet het die jeugliga is ’n outonome organisasie wat vryheid van spraak geniet.
Prof. André Duvenhage, politieke kenner verbonde aan die Noordwes-Universiteit, het gesê hierdie is die ANC se “oomblik van waarheid” in die aanloop tot sy leierskonferensie in Mangaung aanstaande jaar.
Hy het dit vergelyk met die aanloop tot Polokwane toe oudpres. Thabo Mbeki uit die kussings gelig is, maar gesê Zuma is ’n veel sterker en meer uitgeslape teenstander as Mbeki wat sy eie steun “heeltemal oorskat het”.
Duvenhage meen daarom is Malema se kans op oorlewing skraal. “’n Mens kan byna sê Zuma is só besig om seker te maak dat hy as ANC-leier oorleef dat hy sy pligte as staatshoof afskeep.”
Die ANC-woordvoerder, Jackson Mthembu, het nie gister oproepe beantwoord nie. En Mac Maharaj, Zuma se woordvoerder, het botweg geweier om kommentaar te lewer op bespiegelings in die naweekkoerante.
Shivambu wou ook nie met die media praat nie.
Ayanda Kasa-Ntsobi, die jeugliga se provinsiale sekretaris in Gauteng, het bevestig dat hulle bankvas agter hul leiers staan.
Kebby Maphatsoe, voorsitter van die Umkhonto weSizwe militêre veterane-organisasie, het Sondag gewaarsku dat hulle die ANC se hoofkantoor en leiers “met hul lewe” sal verdedig.
Dr. Blade Nzimande, hoofsekretaris van die Suid-Afrikaanse Kommunistiese Party, het gesê hulle verwelkom die ANC se planne om “respek vir organisatoriese demokrasie en dissipline” te handhaaf.
Volg Nuus24 op Twitter.
- Die Burger