Malema praat by saamtrek enkele dae na Zuma jeug kap
2012-02-26 09:15
Johannesburg – Spanning tussen die ANC en sy beleërde jeugliga kan Sondag vererger wanneer die jong leeus hul eie vieringe van die ANC se 100ste bestaansjaar in Soweto hou.
Julius Malema, wat voorlopig vir vyf jaar uit die party geskors is, is die hoofspreker by dié geleentheid, wat om 10:00 in Kliptown begin.
Floyd Shivambu, jeugliga-woordvoerder wat saam met Malema geskors is, het Saterdag aan Rapport bevestig Malema is die hoofspreker.
“Dit is ’n jeugliga-gebeurtenis waar ons self die eeufees van die ANC sal vier,” het hy gesê.
Keith Khoza, ANC-woordvoerder, het Saterdag bevestig dat die ANC nie betrokke is by die jeugliga se eeufeesvieringe vandag nie.
Malema het al dikwels die jeugliga se ontevredenheid uitgespreek omdat hulle nie ’n spreekbeurt by die ANC se hoof-eeufeesvieringe vroeër vanjaar in Bloemfontein gekry het nie.
Khoza het Saterdag gesê die ANC gaan ook tugstappe doen teen sy lede wat Donderdag pres. Jacob Zuma se Sefako Makgatho-lesing in Kaapstad ontwrig het.
Daar word beweer dat die oproeriges jeugligalede en ondersteuners van Malema is wat in Desember Zuma en Gwede Mantashe, sekretaris-generaal van die ANC, op die party se verkiesingskongres in Mangaung as ANC-leiers wil laat vervang.
Shivambu ontken die oproeriges was jeugligalede.
Rapport verneem twee mense is reeds deur die polisie aangekla van sedisie en oproerige gedrag.
Volgens Khoza gaan die ANC in die Wes-Kaap die twee ook intern tug.
Khoza sê die ANC sal bykomende veiligheidsmaatreëls tref om soortgelyke voorvalle by die res van sy eeufeesvieringe, wat die hele jaar sal duur, te voorkom.
Gevra wanneer uitspraak kom in die proses waarin Malema en Shivambu ter versagting van hul skorsing gepleit het, het Khoza gesê: “Ons wag nog vir die nasionale tugkomitee om ons daaroor in te lig.”
Zuma se lesing is Donderdag ontwrig enkele ure nadat hy in ’n toespraak aan die vakbond Numsa in Johannesburg kaalvuis onder die jeugliga oor dissipline en dié se ondergeskiktheid aan die ANC ingeklim het.
Zuma het gesê die jeugliga is deel van die ANC. “Daarom moet die jeugliga en sy grondwet onderhewig aan dié van die ANC wees.”
Die jeugliga hou sy grondwet voor en weier dat Malema en ander geskorste leiers hul poste ontruim ongeag dat hulle deur die ANC geskors is.
Volgens Zuma moet die jeug weens die uitdagings in Suid-Afrika uitgesproke wees, “maar binne politieke grense” bly.
Zuma meen talle vorige jeugdige ANC-leiers met wie die huidige jeugliga-leiers hulle dikwels vergelyk – soos oudpres. Nelson Mandela, asook Walter Sisulu, Moses Kotane en Peter Mokaba – was baie uitgesproke, maar “polities gedissiplineerd”.
Die jeugliga het Vrydag die ontwrigting van Zuma se lesing veroordeel. Shivambu ontken ook dat dié ontwrigting veroorsaak is deur die “mediageskepte persepsie” dat daar wrywing tussen die leiers van die ANC en sy jeugliga is.
Shivambu vra dat die ANC-leierskorps gerespekteer word en dat partylede die regte platforms gebruik om hul “frustrasies en afkeer van sommige in die leierskorps te opper”.
“Die leierskorps van die ANC het ’n verantwoordelikheid om na al sy lede te luister en moet nooit die deur vir enigeen toemaak nie.”
– Volg Nuus24 op Twitter
- Rapport
