Malema, mynwerkers dien klag teen polisie in

2012-08-21 07:15

Johannesburg – Julius Malema, geskorste leier van die ANC se jeugliga (ANCYL), sal Lonmin-mynwerkers vergesel om klagtes teen die polisie in te dien.

“President Julius Malema sal leiers van die Lonmin-mynwerkers na die Marikana-polisiestasie [Dinsdag om 07:00] vergesel om ‘n polisiesaak van moord teen al die polisiemans en -vroue wat die 34 mynwerkers doodgemaak het, aanhangig te maak...” het Floyd Shivambu, voormalige woordvoerder vir die ANCYL, in ‘n verklaring gesê.

Pres. Jacob Zuma het ‘n kommissie van ondersoek aangestel om die voorval te ondersoek.

Die polisie het Donderdag op duisende werkers wat wapens gedra het, begin skiet terwyl hulle vanaf ‘n nabygeleë koppie, waar hulle dae lank bymekaar gekom het, gehardloop het.

Altesaam 34 werkers is doodgeskiet en meer as 70 mense het beserings opgedoen.

Die polisie het ook 260 mynwerkers ná die skietery vir openbare geweld in hegtenis geneem. Hulle is intussen in die Ga-Rankuwa-landdroshof borgtog geweier.

Die betogings het vermoedelik te make met mededingendheid tussen die National Union of Mineworkers (Num) en die Association of Mineworkers and Construction Union (Amcu) oor erkenningsooreenkomste by die myn. Werkers wou ook meer betaal word.

Volg Nuus24 op Twitter 

- SAPA