Malema-moles kan ANC-fees versuur
2012-01-08 07:43
Lizel Steenkamp en Suné Kitshoff
Bloemfontein – Die ANC is op hete kole weens dreigemente van Julius Malema, geskorste ANC-jeugleier, se ondersteuners om pres. Jacob Zuma Sondagmiddag by die party se eeufeesvieringe in Bloemfontein voor internasionale hooggeplaastes te verneder.
Zuma is die hoofspreker in die Vrystaat-stadion, waar duisende mense verwag word vir die viering van die ANC se stigting 100 jaar gelede.
Vrese hieroor het toegeneem nadat ondersteuners van Malema weer, op die vooraand van dié vieringe, op ’n vernederende wyse na Zuma verwys het met ’n lied waarin hulle sing “die stort gee ons probleme”.
Dié woorde verwys na Zuma se opmerkings tydens ’n vroeëre hofsaak dat hy ná seks gestort het om MIV/vigs te voorkom – en waarvoor hy om verskoning gevra het.
Dié optrede is deur Gwede Mantashe, die ANC se sekretaris-generaal, bestempel as “simptome van anargie”, berig Rapport se susterkoerant City Press.
Malema het in een van sy toesprake ’n hou gemik na diegene in die ANC wat dink “hulle het nou gearriveer”.
“Hulle weier om jou te huur, want hulle sê julle is nie opgevoed nie. Dié bobbejaan vergeet dat hy self nie opgevoed is nie. Hy praat gebroke Engels, hoewel hy vlot Sotho gepraat het toe julle hom verkies het. Hy wil nou skielik Engels praat.”
Malema het Saterdag interpretasies dat hy na Zuma verwys het as “snert” afgemaak.
“Ek het van mense gepraat wat in plakkerskampe verkies word en dan iets anders word. Ek het nooit oor die nasionale leierskap gepraat nie.”
Benewens oudpres. Thabo Mbeki en die families van ander voormalige ANC-leiers, sal talle staatshoofde, onder wie press. Goodluck Jonathan van Nigerië, Ian Khama van Botswana en Hifikepunye Pohamba van Namibië by vandag se geskiedkundige geleentheid wees.
Hoewel nie Malema óf die leiers van die vakverbond Cosatu en die SAKP vanmiddag ’n spreekbeurt kry nie, is daar kommer oor of Malema-ondersteuners in die paviljoen hulle gaan gedra. Diegene wat ongelukkig is oor die wyse waarop die ANC die heethoofdige Malema se politieke loopbaan kortgeknip het, kan Zuma in die verleentheid stel deur te sing en dans en hom selfs uit te jou terwyl hy sy toespraak lewer.
Keith Khoza, ANC-woordvoerder, het bevestig die ANC het gebeurlikheidsplanne om “ontwrigtende elemente” in die kiem te smoor en die polisie is ook gereed. Dit is nie onwettig om te sing wanneer Zuma praat nie, maar volgens Khoza is dié geleentheid in ’n ander klas omdat buitelandse staatshoofde dit bywoon.
“Ons sal niks duld wat ontwrigtend is of die veiligheid van staatshoofde kan bedreig nie,” sê hy.
Nog ’n lid van die ANC se nasionale uitvoerende komitee sê die leierskap is bewus van die “gerugte” oor ontwrigtings.
“Maar ons het alles agtermekaar om dit te hanteer.”
Volgens hom hou die groep nie ’n wesenlike bedreiging in nie omdat hulle “ongeorganiseerd” is en hul optrede deur duisende ander in die paviljoen “uitgedoof sal word wat na die president wil luister”.
“Maar ons oor is teen die grond. Dis nie ons eerste groot byeenkoms hierdie nie,” sê hy.
Mense in Thabong het gedreig hulle sal vandag na Bloemfontein “marsjeer” om Zuma se toespraak te ontwrig.
Hulle het mnr. Fikile Mbalula, Vrystaatse boorling en minister van sport, as “ons toekomstige leier” beskryf en ook geskreeu: “Voorwaarts met (adj.pres.) Kgalema Motlanthe, voorwaarts!”
Die jeugliga wil hê Motlanthe moet Zuma vervang en Mbalula vir Mantashe wanneer die ANC in Desember sy nuwe leiers kies.
Malema het sy ondersteuners wel gevra om hulle vanmiddag in toom te hou en nie “in my naam” amok te maak nie.
ANC-ondersteuners van Limpopo – Malema se tuisprovinsie waar hy onlangs tot die ANC se provinsiale leierstruktuur verkies is – is met 14 busse na die Vrystaat aangery om die viering vandag mee te maak.
Volg Nuus24 op Twitter
- Rapport