Malema mik na hoër hof
2010-05-20 07:32
Philip de Bruin, Die Burger
Kaapstad. – Die haatspraak-verhoor van Julius Malema, leier van die ANC-jeugliga, in die gelykheidshof in Johannesburg het weer ’n wending geneem.
Die verhoor, wat verband hou met ’n klag van AfriForum oor Malema se sing van ’n lied waarin die omstrede frase “Skiet die Boere” voorkom, sou aanvanklik begin Mei plaasgevind het, maar is deur die gelykheidshof tot Donderdag uitgestel.
Die formele verhoor sou egter nie Donderdag begin nie.
Die partye sou die hof net moes toespreek oor die prosedure wat met die verhoor gevolg moet word en dan sou ’n verhoordatum bepaal word.
Maar Dinsdag het Malema se prokureurs die hof in kennis gestel dat Malema vandag gaan vra dat die verhoor ingevolge die Wet op die Bevordering van Gelykheid en die Voorkoming van Onbillike Diskriminasie na die hooggeregshof verwys word.
Teen Woensdag laat het AfriForum nog nie kennis gegee dat die aansoek beveg gaan word nie.
Twee organisasies wat aansoek gedoen het om as amici curiae(vriende van die hof) tot die geding toegelaat te word, het intussen hul betooghoofde by die gelykheidshof ingedien.
Intussen het die Freedom of Expression Institute (FXI) gesê hy wil die hof graag toespreek oor onder meer “die korrekte benadering wat gevolg behoort te word met die beregting en oplossing van gevalle van haatspraak”.
- Die Burger