Malema-liedjie: Luisteraars dreig om naak te hardloop
2011-11-19 19:45
Kaapstad – ‘n Oorlog het op die sosiale netwerk Facebook uitgebreek nadat twee platejoggies van Ukhozi FM geskors is omdat hulle die omstrede liedjie oor die geskorste leier van die ANC-Jeugliga, Julius Malema, gespeel het.
Volgens ‘n bron wou die SABC aanvanklik vir Khathide “Thsatha” Ngobe en Ngizwe “Zulu Charmer” Mchunu afdank, maar die stasie het gepleit dat hulle slegs geskors moet word.
Luisteraars, van wie sommige gedreig het om naak buite die SABC se hoofkantore te hardloop uit protes teen die twee platejoggies wat geskors is, het ‘n Facebook-blad getiteld “Vriende en Ondersteuners van Zulu Charmer” oopgemaak om hul steun te wys.
Die kontroversiële liedjie is deur Izingane Zoma, ‘n maskandi-groep, geskryf.
Volgens Kaizer Kganyago, woordvoerder van die SABC, is Ngobe en Mchunu nie geskors oor die omvang van die liedjie nie maar omdat hulle die radiostasie se reëls verbreek het.
“Die SABC het ‘n komitee wat die musieklys deurgaan voordat dit aan die publiek gespeel word. Hierdie platejoggies het die liedjie gespeel voordat dit deur die komitee goedgekeur is.”
Gareth Cliff, bekende radiopersoonlikheid by 5FM, het glo ook die liedjie op sy ontbytprogram gespeel. Kganyago het gesê Cliff sal gestraf word indien hy die stasie se reëls verbreek het.
Die twee platejoggies was nie vir kommentaar beskikbaar nie.
– iol.
– Volg Nuus24 op Twitter.