Malema kry terugslag in Kaap
2011-12-05 08:03
Kaapstad – Die steunveldtog van Julius Malema, leier van die ANC-jeugliga, het die naweek ’n terugslag gekry toe die Wes-Kaapse jeugliga nie sy provinsiale kongres aan die gang kon kry nie.
Dit is Sondagmiddag ná byna twee dae se gesukkel onbepaald uitgestel – glo midde verdeeldheid oor ondersteuning vir Malema.
Die beleërde jeugleier sou afgevaardigdes eergister by die Universiteit van Wes-Kaapland toespreek, maar was nêrens te sien nie.
Van die lede het gesê hy was nie te vinde om ’n halfvol saal toe te spreek nie aangesien die meeste afgevaardigdes eers teen die namiddag slenter-slenter begin opdaag het.
Die jeugliga in die Wes-Kaap is leierloos nadat sy provinsiale bestuurskomitee in Mei verlede jaar ontbind is ná hy nie betyds sy konferensie kon saamroep nie. ’n Taakspan het intussen die leiding oorgeneem. Die kongres sou Saterdag om 10:00 begin, maar teen middernag het afgevaardigdes tou opgegooi. Die twee mededingers vir die pos as voorsitter in die provinsie die naweek was Luvo Makasi en Jonton Snyman.
Albei kampe se ondersteuners moes egter gister bekaf huis toe keer ná die kongres omstreeks 12:30 in ’n kort geslote sessie afgestel is.
Malema, wat verlede maand deur die ANC geskors is en appèl aangeteken het, wou luidens berigte die kongres gebruik om sy steunbasis te verstewig.
Verskeie afgevaardigdes wat anoniem wou bly het gesê daar kon nie “eenheid” oor Malema gevind word nie en daarom is die kongres uitgestel. Geen amptelike ondersteuningstem kon vir Malema uitgereik word nie.
Die jeugliga se sekretaris-generaal, Sindiso Magaqa, het egter Sondag gesê registrasieprobleme was die oorsaak van die uitstel en nie verdeeldheid oor Malema nie.
– Volg Nuus24 op Twitter
- Die Burger