Malema kry nie aftrek in Wes-Kaap
2011-12-04 08:02
Kaapstad – Julius Malema, geskorste ANC-jeugligaleier, is steeds nie ’n trekpleister in die Wes-Kaap nie.
Die jeugliga in dié provinsie het Saterdag met moeite probeer om uiteindelik sy verkiesingskongres by die Universiteit van die Wes-Kaap in Bellville te hou, maar teen 16:00 was die vereiste kworum nie teenwoordig om die kongres amptelik te begin nie.
Die jeugliga het gedurende die week afgevaardigdes van sy beweerde 300 takke verwag, met Malema as gasspreker.
Rapport het verneem Malema was wel in Kaapstad, maar het vir die organiseerders gesê hy sal eers opdaag as daar genoeg mense is.
Met die jeugliga se 66ste verjaardag verlede jaar kon Malema ook nie mense trek soos elders in die land nie.
Tydens dié byeenkoms in Cloetesville naby Stellenbosch – juis om meer bruin stemme te werf – het sowat 1 000 jong mense opgedaag en was dinge stram tussen Malema en pres. Jacob Zuma, die gasspreker.
Magdalene Moonsamy, waarnemende woordvoerder van die ANC-jeugliga, het Saterdag aan Rapport gesê daar word sowat 600 mense verwag as elke tak twee afgevaardigdes sou stuur.
Teen die tyd dat wegneem-boksies met braaihoender aan afgevaardigdes uitgedeel is, kon Rapport nie meer as 100 mense tel nie.
Moonsamy het nie uitsluitsel gegee oor hoeveel mense ’n kworum behels nie.
Die ses Wes-Kaapse ANC-gebiede het verlede maand hul algemene vergaderings gehou en ondanks die deurmekaarspul en onmin in die Boland het twee name uitgestaan as ’n moontlike Wes-Kaapse jeugleier: Luvo Makasi en Jonton Snyman.
Snyman is ’n voormalige jeugliga-tesourier in die provinsie en Makasi is ’n vertroueling van Marius Fransman, ANC-leier in die Wes-Kaap en nasionale adjunkminister van internasionale aangeleenthede.
Loyiso Nkohla is na bewering Snyman se keuse as adjunkleier.
Nkohla het verlede jaar opslae gemaak toe hy die beskutting om die oop toilette in Makhaza, Khayelitsha, afgebreek het.
Volg Nuus24 op Twitter
- Rapport