Malema-klagte nou in weegskaal
2011-09-01 07:03
Maryna Louw en Jacques Steenkamp
Johannesburg – Die tugverhoor van Julius Malema, ANC-jeugligaleier, is Woensdag verdaag terwyl die tugkomitee ’n versoek oorweeg om al die klagte teen hom te skrap.
Sy regspan het die afgelope twee dae alles in die stryd gewerp om hom nie aan die pen te laat ry nie.
Die span, gelei deur adv. Patric Mtshaulana, SC, en adv. Dali Mpofu, SC, voorheen groephoof van die SAUK, het twee keer versoek dat die klagte geskrap moet word.
Hulle het eers aangevoer dat ’n verhoor deur die ANC se nasionale tugkomitee (NDK) nie die regte forum is om die klagte te hanteer nie. Dié versoek het misluk.
Hulle het daarna weer versoek dat die klagte laat vaar moet word. Die basis vir dié versoek is nie bekend nie, maar Eyewitness News het Woensdagmiddag berig dit hou verband met prosedures wat glo nie reg gevolg is nie toe Malema aangekla is.
Die NDK het Woensdagaand in ’n verklaring gesê die verhoor het verdaag “om oor die substantiewe kwessies wat deur albei partye opgehaal is, te beraadslaag. Die uitspraak sal Vrydag omstreeks 09:00 gelewer word.”
Malema se regterhand, Floyd Shivambu, woordvoerder van die jeugliga, se tugverhoor sou Woensdag in Johannesburg plaasgevind het, maar dit is tot ’n latere (onbekende) datum uitgestel.
Die NDK het die jongste versoek Woensdag bespreek en sal vandag ook daarvoor gebruik.
Malema se regspan het vroeër ook probeer om drie lede van die NDK onttrek te kry.
Na verneem word, is dié lede Susan Shabangu, minister van minerale bronne, Derek Hanekom, voorsitter van die tugkomitee, en Collins Chabane, minister in die presidensie, berig Mandy Rossouw.
Jackson Mthembu, ANC-woordvoerder, het Woensdagaand in ’n verklaring gesê dié versoek is van die hand gewys omdat beweringe van partydigheid of ’n persepsie van partydigheid nie gestaaf kon word nie.
Rossouw berig Muzi Sikha-khane, een van Malema se prokureurs, is ook Dinsdagaand uit die verhoor gegooi omdat hy “nie ’n ANC-lid met ’n goeie reputasie” is nie.
Die partye het reeds met die begin van die verhoor ooreengekom dat ’n klagte wat verband hou met die inbars van jeugligaleiers by ’n vergadering van ANC-amptenare, van Malema se klagstaat verwyder word “ter wille van gerief”.
Malema sal nou Vrydag saam met vier ander jeugliga-ampsdraers op dié klagte verskyn. Hulle is Sindiso Magaqa, sekretaris-generaal; Ronald Lamola, adjunkpresident; Pule Mabe, tesourier; en Kenetswe Mosenogi, adjunk-sekretaris-generaal.
Die omgewing rondom Luthuli-huis in die Johannesburgse middestad was Woensdag kalm met net sowat 150 jeugliga-ondersteuners wat onder streng polisiebewaking betoog het.
Terwyl die polisie en die media Dinsdag met klippe en gebreekte glasbottels bestook is, was daar teen druktyd geen nuwe voorvalle van geweld aangemeld nie.
Volg Nuus24 op Twitter.
- Volksblad